Thursday, September 27, 2012

ഞാന്‍ തനിച്ചായത്‌ പോലെ ...

 
 
 
ശവം   നാറി പൂക്കള്‍ വിരിയുന്ന
ഈ താഴ്‌വരയില്‍ ഞാന്‍ തനിച്ചായത്‌ പോലെ ...
 
...................................................................
കാറ്റിന്റെ കഴുത്തില്‍ തൂങ്ങി മറുപുറം തേടുന്ന അപ്പൂപ്പന്‍  താടിപോലെ
നീ പറന്നു നടക്കുമ്പോള്‍ ....
...................................................................
പേപിടിച്ച  ചിന്തകളില്‍  കടിച്ചു തൂങ്ങി 
ചീര്‍ത്തു വലുതാകുകയാണ്
നീ എനിക്ക് തന്ന  സ്നേഹത്തിന്റെ വിത്തുകള്‍
...................................................................
ഒരു ചിന്തയുടെ ചില്ല് പൊട്ടിയ കൂടിനു പുറകില്‍
വെക്കാന്‍  എനിക്ക് എന്തിനാണ്
വെഞ്ചിതലുകള്‍ തിന്നു തുടങ്ങിയ
ആ പഴയ ഓര്‍മ  പുസ്തകം ....?
............................................................................
പറയാതെ പോയതും അറിയാതെ പോയതുമായ 
അനേകം പരാതികളുടെ ചിത്രങ്ങള്‍ 
ആലേഖനം ചെയ്ത  ആ ചിത്രപെട്ടി
ഞാന്‍ ഇവിടെ ഉപേക്ഷിക്കുകയാണ് ....
..................................................................
ഇനിയും അറിയാന്‍..പറയാന്‍ ഒരു ജന്മം ഉണ്ടായാല്‍
നിനക്ക് തരാനായി ......

Tuesday, September 11, 2012

എപ്പോഴാണ്....?




നീ നടന്ന വഴികളില്‍ കാല്‍പ്പാദങ്ങള്‍ ചേര്‍ത്ത് വെച്ച്
ഞാന്‍ സീത കല്യാണത്തിന്റെ ആദ്യ ചുറ്റു പൂര്‍ത്തിയാക്കിയപ്പോള്‍
പൊഴിഞ്ഞ മഴയുടെ ആദ്യതുള്ളിക്ക് പനിനീരിന്റെ ഗന്ധം ....

പിന്നെ എന്നെ തൊട്ടു  വിളിച്ചതു... 
ഇലത്താളത്തിന്റെ സ്വരം ...
പറയാന്‍ പറ്റാതെ ഉള്ളില്‍ തങ്ങിയ  വാക്കുകള്‍ക്ക് പകരം
വെക്കാന്‍ അഷ്ടപദിയുടെ വരികള്‍ ....

കല്ദീപങ്ങള്‍ക്ക് പുറകില്‍ നിന്നും നിന്റെ കള്ള നോട്ടം
അതില്‍  വെണ്ണ പോലെ ഞാന്‍ അലിഞ്ഞില്ലാതെ ആയപ്പോള്‍
കാര്‍ മേഘ ചുരുളുകള്‍ക്ക്  പിന്നില്‍ നിന്നു നിലാവിന്റെ എത്തി നോട്ടം ...

നിന്നെ രാവിന്‍റെ പുതപ്പില്‍  തനിച്ചാക്കി
പടിയിറങ്ങിയ എന്നെ തടഞ്ഞത് നിന്റെ
അകില്‍  ഗന്ധമോ അതോ വേണു ഗാനമോ ...?
എപ്പോഴാണ് നീ എന്റെ കനവുകളില്‍ നിന്ന്
മുന്നില്‍ വരിക ....?