Saturday, December 24, 2011

മനസ്സേ മടങ്ങുക !!



നീ കത്തിക്കുന്ന  ചിരിയുടെ തിരിയുടെ അങ്ങേ തലക്കല്‍
ഞാന്‍ പുകയുകയാണ് ...

എന്റെ വിരല്‍ തുമ്പില്‍ നീ കുരുങ്ങിയ
നിമിഷങ്ങള്‍ എന്നെ ഓര്‍മകളുടെ കാരാഗൃഹത്തില്‍
തടവില്‍ ഇടുകയാണ് ..

നീ എന്നില്‍ നേര്‍ത് പെയ്ത നിമിഷങ്ങള്‍
എന്റെ വിരഹാഗ്നിയില്‍ എണ്ണ പകരുകയാണ് ..

നിന്റെ കണ്ണിന്റെ കറുപ്പ് എന്റെ നിമിഷങ്ങളെ
ഇരുട്ടില്‍ ആഴ്ത്തുകയാണ്‌ ..
  
നീയെനിക്ക് അക്ഷരങ്ങളുടെ
അങ്ങേ തലക്കലെ  അവ്യക്തമായ രൂപമായീ
തീര്‍ന്നിരിക്കുന്നു ...

പതറുന്ന കാല്‍പ്പാടുകള്‍ കൂടി ചേര്‍ത്ത്
നടക്കാന്‍ ശ്രമിക്കുന്ന ഒരു വൃദ്ധന്റെ ചുളിഞ്ഞ രൂപം ...

വാക്കുകള്‍ വീണു മരിക്കുന്ന   
കനലിന്റെ തീചൂടില്‍  എണ്ണ പകര്‍ന്നു നീ നീറുന്ന
ഒരു ഓര്‍മയുടെ അവ്യക്തത സമ്മാനിക്കുന്നു

നിന്റെ  ചിരിയുടെ കാണാക്കയത്തില്‍
എന്റെ കരച്ചിലുകള്‍ കൈകാലുകള്‍ അടിക്കുന്നു

കാത്തിരുപ്പിന്റെ നീണ്ട വര്‍ഷങ്ങള്‍
എന്നില്‍ തീര്‍ത്ത മടുപ്പിന്റെ നിശ്വാസങ്ങള്‍
ഇട തടവിലാതെ പെയ്ത മഴനൂലുകല്‍ക്കൊപ്പം
ഇല്ലാതെ ആകുന്നു ...

മനസ്സേ  മടങ്ങുക ..കാണാ കാഴ്ചകള്‍ പിന്നിലുപേക്ഷിച്ചു
നീ ഇനിയും മടങ്ങുക !!!    

Saturday, December 17, 2011

ആവര്‍ത്തനം

  View Full Size Image
സന്ധ്യയുടെ കവിളില്‍ പ്രണയ വര്‍ണ്ണം
ചാര്‍ത്തി തിരിച്ചു പോകാന്‍ വിധിക്കപ്പെട്ട പകല്‍...

രാവിന്‍റെ കറുത്ത കൈകളില്‍ കിടന്നു പിടഞ്ഞു
മരിക്കുന്ന സന്ധ്യയുടെ  വേദന ..

മഴയുടെ കുളിരില്‍ മുഖം കറുപ്പിച്ചും
കാറ്റിന്റെ വരവില്‍ വീണ്ടും ചിരിച്ചും
മേഘസംഗീതം ...

പകലിന്റെ വീണ്ടുവരവില്‍  
കണ്ണുകള്‍ ചുവപ്പിച്ചു രാവിന്‍റെ ഉരുകി തീരല്‍ ...

സൂര്യനെ തേടുന്ന താമരയുടെ
വിരഹത്തിന്റെ ഉള്ളില്‍ .....
ഒരിറ്റു പ്രണയം തേടി
അന്ത്യം വരിക്കുന്ന  വണ്ടിന്റെ അവസാന
സംഗീതം ...

ഒഴുകുന്ന്ന ദിനങ്ങളുടെ തനിയാവര്‍ത്തനം !!!

Monday, December 5, 2011

എങ്ങനെ പറയും .....?





എന്നില്‍ നിന്ന് അവനെ വിലക്ക് വാങ്ങി
തളച്ചിട്ട പച്ച നോട്ടുകള്‍ക്ക്
എന്റെ നഷ്ടനിമിഷങ്ങളുടെ മണം ആണ് എന്ന്
ഞാന്‍ എങ്ങനെ പറയും ..?

അവന്റെ നേട്ടങ്ങളുടെ പടിയില്‍ എന്റെ
സ്വപ്നങ്ങളുടെ ശവ കല്ലറ തീര്‍ന്നത്
പറയാതെ അവന്‍ എങ്ങനെ അറിയും ..?

എന്നിലേക്ക്‌ ഞാന്‍ ഒതുങ്ങിയ ദിനങ്ങള്‍ക്ക്‌
മുകളില്‍ പെയ്യാന്‍ അവന്റെ വിയര്‍പ്പിന്റെ ചന്ദന ഗന്ധം
ഉണ്ടായിരുന്നു എന്ന് അവന്‍
അറിയുന്നുണ്ടാകുമോ ..?  

നേട്ടങ്ങള്‍ക്ക്‌ മുകളില്‍ കുരുങ്ങിയ കണ്ണുകളില്‍
എന്റെ അവ്യക്തത നിറഞ്ഞ രൂപം
തെളിയുന്നുടകുമോ ..?

എന്റെ വാക്കുകളില്‍ കുരുങ്ങുന്ന
നഷ്ടബോധം നിന്നെ തേടുകയാണ്
എന്ന് ഞാന്‍ എങ്ങനെ പറയും .....?